قصة واخيرا وجدت طعم السعادة

*وأخــــــــــــــــــــــــــــــــــــــــــــــ ــيـرا*
وجدت طعم
*السعـــــــــــــــــــــــــــــــــــــــــــــ ــــادة*


أم سارة:يللا قومي سارة.. تأخرتي عن المدرسة.
سارة:يمه أبي أنام ما نمت إلا متأخرة...
أم سارة:ليش نايمة متأخرة و ورآك مدرسة....
سارة:يمه تعرفين توي شارية أفلام من مكتبة جرير وأمس توي مخلصتها.
أم سارة:يا سلام...ومن سمح لك تشترين أفلام... يا حبيبتي ما يصلح حياتك كلها أفلام ومسلسلات وأغاني ما ينفع كذا....
سارة كانت كل يوم تسمع هذا الكلام من أمها بس هي ما تتحمل إذا البنات تكلموا عن مسلسل إلا وتروح تتابعته ....
قامت سارة وراحت المدرسة "في الفسحة".
شذى:سارة أمس شفتِ المسلسل(...........)
الحلقة الأخيرة....
سارة:احلفي أنا دايما حظي شين.. أتابع المسلسل من الحلقة الأولى وإذا جاءت الحلقة الأخيرة تفوتني .. علميني وش صار ...
شذى: بطل القصة(.....) مات والحلقة أمس كلها صياح...
سارة:صدق.. يا حسافة يا ليت إني شفتها..
شذى:تصدقين أول ما شفت الصياح قعدت أصيح معهم واشاهق بعد..
كانت ريما جالسة معهم...
ريما: شذى حرام عليك تصيحين عشان مسلسل الحين الناس يصيحون عشان ربي يغفر لهم...
ورمضان على الأبواب وش بتسون فيه..
شذى وهي متحمسة:في مسلسل شكله مرة حلو خطير لا يفوتك يا سارة...
سارة:وش هذا المسلسل صراحة مسلسلات رمضان غيـــــــــــر..
ريما وهي معصبة: حرام عليكم الحين شهر رمضان أفضل الشهور وفيه أفضل ليلة وهي ليلة القدر وانتم تتابعون مسلسلات..
سارة: صح عليك يا ريما بس ما اقدر كل مسلسل أحلى من الثاني في رمضان وشلون تبيني ما أتابعهم عطيني البديل..
ريما:عندك في قناة المجد" مطبات" ولا أحلى منه "وبواري" يكفي انه ما في موسيقى ولا في حريم.
شذى وهي تقاطعها:أقول اسكتي يا ريما..
أنت ما تبين توسعين صدرك بكيفك بس خلي سارة.. مالك دخل فيها.
ريما:أنت لا تصيرين داعية للشر الحين ما تحملت آثامك عشان تتحملين آثام غيرك.
سارة:خلاص بنات غيروا الموضوع.. إيه شذى أمس سهرت على الأفلام اللي قلتي لي عليها بس صراحة بعضها فيها قلة أدب...
شذى :صدق..أنت ما عليك من قلة الأدب
بس وسعي صدرك.
ريما:هيه أنت شذى منتي بصاحية تخلينها تشوف أشياء فيها قلة أدب
شذى:الله اكبر.. هي ما راح تقلدهم بس تشوفهم
ريما: ما شاء الله عليك.. بس تشوفهم>> تقلدها
ترى كل اللي تناظر تأخذين آثام لك ولها إذا صرت ما تبين تتركين الأفلام خلي سارة بكيفها لا تصيرين رفيقة سوء...
شذى:أنت ريما وش فيك معقدة لهذه الدرجة..
ريما:أقول بس خليني أقوم.. القعدة معكم تجيب الهم والكلام معكم ما في فايدة...
شذى: أبركها من ساعة..
قامت ريما معصبة مرره من شذى ومن سارة اللي مالها شخصية كل ما قالت شذى شيء تسويه ما تفرق بين الخير والشر...
سارة كانت متضايقة من كلام شذى لأنها قوّمت ريما.. بس كانت ساكتة...
بدا شهر رمضان الكريم (في المدرسة)
ريما كانت تبي تقعد مع سارة من دون شذى وأخيــــــرا شذى طلعت من الفصل...
ريما:هلا سارونة كيفك...
سارة: هلا وغلا من زمان عنك...
ريما: كم باقي لك وتختمين القران...
سارة وهي منزلة رأسها:تصدقين يا ريما
ما فتحت القران في رمضان...
ريما وهي مب مصدقة: ولا مرة منتي بصاحية في احد ما يفتح القران في هذا الشهر الفضيل...
سارة: ما عندي وقت أول ما ارجع من المدرسة أنوم إلى آذان المغرب.
ريما وهي مقاطعتها: وصلاة العصر.
سارة:إذا قمت افطر ثم أصلي العصر والمغرب.
ريما: حرام عليك يا سارة ترى الصلاة أهم من الصيام...
سارة: طيب ما اقدر.. أنا أجوع بسرعة...عطيني حل..؟
ريما:أول ما ترجعين من المدرسة نومي إلى العصر ثم قومي صلي واقري قران ثم ساعدي أمك في المطبخ وما تدرين إلا ويذن المغرب.... طيب وش تسوين بعد المغرب..؟
سارة:إذا خلصت من الصلاة أصير 24 ساعة عند التلفزيون كل القنوات مليانة مسلسلات من مسلسل إلى مسلسل وبعدين يخلص يومي وأنا ما فتحت القران...
ريما:طيب ما تصلين صلاة التراويح..
سارة:ما اقدر.. خاصة إن في مسلسل ما اقدر أخليه...
ريما: وش ينفعك المسلسل يوم القيامة صلاة التراويح أهم بكثيــــــــــــــــــــــر....
سارة: ابحاول يا ريما ابحاول....
..جاءت شذى..
شذى:ما شاء الله عليك يا ريما بديت بنصايحك.
ريما أول ما شافت شذى قامت..
سارة قررت تروح تصلي التراويح مثل ما قالت لها ريما كانت لابسة عبايتها...
سارة:يمه أبروح معك أصلي التراويح..
أم سارة:ياللا يا بنيتي بسرعة لا تفوتنا التسليمة الأولى..
..يرن جوال سارة..
سارة وهي مستعجلة:الو
شذى: هلا سارونة بسرررعة لا يفوتك المسلسل الحلقة مرررة رووعة...
سارة طار عقلها ما قدرت على طول فتحت التلفزيون...
أم سارة:بتروحين معي ولا..لا..؟
سارة وهي مترددة:خلاص يمه منب رايحة..


خلص شهر رمضان ....وبدت الاختبارات الشهرية...

كان في امتحان نحو( في المدرسة)
سارة:يا ويلي ما فتحت الكتاب خايفة ما احل زين...
شذى: أنا عندي حل ولا أحلى منه..
سارة: شذى ياللا بسرعة عطيني حل..
شذى:أننا نغش..
سارة: وش نغش ما تدرين إن الغش حرام..
شذى:بكيفك هذا هو الحل الوحيد وشلون تبين تحلين زين وأنت ما فتحت الكتاب...
سارة وهي تفكر..
شذى: ها. وش قلتي..
سارة:طيب.. خلاص..
(في الامتحان)
كانت سارة مرة خايفة ومرتبكة كانت أول مرة تغش في حياتها...
كانت شذى وراء سارة...
الإستاذة وزعت الأوراق...
شذى عطت سارة ورقة مكتوب فيها الحل..
ريما شافت سارة وهي تأخذ الورقة..تفاجئت إن سارة تغش في الامتحان...
خلص الامتحان وكانت سارة مرة فرحانة إن الإستاذة ما شافتها...
ريما راحت عند سارة من دون شذى طبعا...
ريما: سارة..صدق انك غشيتي في الامتحان ..
سارة وهي فرحانة:تصدقين الإستاذة ما شافتني..
ريما:طيب ما شافك اللي فوق السموات والأرض ..سارة أنت خفت من الإستاذة ولا خفت من الله اللي يناظرك طول الأوقات...
ما حسيتي بمراقبته..؟
سارة وهي منزلة رأسها:بس أنا ما ذاكرت... أمس كان عندنا ضيوف ولا فتحت الكتاب..عشان كذا غشيت..
ريما:تدرين إن واحد سئل الشيخ..قال أنا كنت أغش والحين أنا متوظف هل راتبي حلال أو حرام!!.. تدرين وش قال الشيخ..؟
سارة: وش قال..؟
ريما:قال فلوسك كلها حرام..عندك خيارين...
1)انك تروح تستأذن من المدرسين اللي درسوك وتقولهم إني كنت أغش...
2)انك تعيد كل اللي درسته...
سارة وهي مب مصدقة: صدق يا ريما اللي تقولينه...
ريما:أي صدق..ترى الغش ذنبه كبير بس الناس يستهينون فيه...
سارة: خلاص يا ريما..إن شاء الله من اليوم ورايح ما راح أغش في حياتي...

خلصت الثانوية وفي آخر يوم كل وحدة تعطي صديقتها هدية..

ريما كانت مجهزة لسارة هدية...
كانت عبارة عن علبة مرة فخمة لونها احمر وفيها ورود مجففة حمراء...حطت اوراق حمراء مكتوب فيها ..(أحبك في الله)
ورسالة مكتوب فيها:
إلى الغالية:ســــــــارة
كم إني احبك وأخاف عليك من النار...
ألا تعلمين من يسمع الأغاني يصب في إذنيه يوم القيامة صديد مذاب...
ألا تعلمين من يلبس قصير يكون مما قاله الرسول"صنفان من أهل النار لم أرهما" وذكر منهما "نساء كاسيات عاريات "وفي آخر الحديث" لا يدخلن الجنة ولا يجدن ريحها"
كيف أن تمنعين نفسك أن تدخلين الجنة .....
بل كيف أن تمنعين نفسك أن تشمين ريحها...
من اجل تنورة قصيرة تلبسينها وتتمتعين فيها لمدة ثوان فقط...وتتحسرين منها إلى أمد لا يعلمه إلا الله...
قد أطيل عليك..لكني سوف أدعو لك ما دام فيني عرق ينبض...وأتمنى أن تكوني داعية يوم من الأيام تأمرين بالمعروف وتنهين عن المنكر....
والســـــلام خير ختـــــام

*محبتك في الله*
ريمـــــــــــــــــــــا

حطتها في العلبة وجابت شريط"وغارت الحور"
لـ "عبد المحسن الأحمد "وغلفته بتغليفه حمراء..
صراحة كانت الهدية مررة فخمة و رووعة....
ريما كانت تبي تعطي سارة الهدية من دون شذى...طبعا كانت شذى مع سارة....
ريما: سارة تعالي شوي....
سارة :ياللا الحين أبجي.....
شذى: وش تبين من هذه المعقدة...
سارة:حرام عليك ريما مب معقدة..أبروح لها...
سارة راحت عند ريما...
ريما: هذه هدية مني وأتمنى انك تقبلينها...
سارة وهي متفاجئة: ليش تعبت على نفسك...
ريما:لا تعبك راحة...بس أتمنى انك تقبلين اللي داخل الهدية بصدر رحب...
سارة: إن شاء الله ..والله إني مقصرة معك بس اعذريني...
ريما:يمكن هذا اللقاء يكون آخر لقاء بيننا...
وان شاء الله هذه الهدية تكون ذكرى بيننا...
سارة وهي مبتسمة: إن شاء الله...
شذى: سارة ياللا تعالي لا تجلسين مع المعقدين مثل بعض الناس.. وتناظر ريما...
ريما كانت متعودة على كلام شذى علشان كذا سفهتها...
سارة تضايقت من كلام شذى بس كانت ساكتة...

خلصت الثانوية وجاءت الجامعة ريما دخلت قسم شريعة في جامعة الإمام...
وسارة كانت تتمنى تدخل قسم فنية...
بس ما قبلوها عشان نسبتها كانت واطية...
كانت طول الوقت بغرفتها تصيح...
"رن جوالها"
قامت سارة بتثاقل وردت على جوالها...
سارة:الو
شذى: هلا وغلا بهذا الصوت...
سارة: هلا فيك...
شذى: سارونة..وش في صوتك متغير
سارة:شذى أنا مرة تعبانه...
شذى:عسى ما شر وش فيك...
سارة:ما قبلوني في الجامعة.... تحطم حلمي يا
شــــــذى...
شذى:حتى أنا مثلك ما قبلوني.... بس خلينا نوسع صدرنا بالدش...مليان قنوات..وكل قناة أحلى من
الثانيــــــــــــــــة...
سارة: يا ليت يا شذى علشان أنسى حلمي...

"مرت 3سنوات"
وصار حال سارة من مسلسل إلى مسلسل.... ومن أغنية إلى أغنية.... ومن فيلم إلى فيلم....
سارة حست بملل وضيقة صدر...مع إن كل شيء عندها.. بس ما حست بطعم السعادة....
ملت من شذى كلما كلمتها قالت لها عن اسم فيلم.. مسلسل.. أغنية.. ما صارت تطيقها...
تذكرت ريما كان ودها إنها تكلمها..ودها تسمع نصايحها...راحت تدور رقمها...
واخيــــــــرا لقت الرقم... حست بالفرحة يوم لقته...كانت متشوقة مررة تسمع صوتها...
"اتصلت عليها"
سارة: السلام عليكم..
أم ريما: وعليكم السلام ورحمة الله وبركاته..
سارة: موجودة ريما..
أم ريما وهي مستغربة: حبيبتي ما احد قال لك وش صار لها...
سارة وقلبها يدق: لا يا خالتي الله يعافيك قولي لي بسررعة...
أم ريما: أبقولك قصتها ...كان في شهر رمضان وبالتحديد ليلة 27 كانت ريما طول الليل تصلي صلاة القيام>>ما قدرت تكمل من كثر صياحها
سارة وهي متحمسة: وبعدين وش صار لها يا خالتي...
أم ريما وهي تصيح:الله قبض روحها وهي
ساجــــــــــــــــــدة...
سارة وهي مب مصدقة: يعني ماتت!.؟
أم ريما: أي ماتت..ماتت وخلتني بروحي...
ادعي لها بالرحمة والمغفرة..وان الله يثبتها عند السؤال...

سارة أول ما سكرت السماعة ما كانت مستوعبة الكلام اللي سمعته...
راحت عند الهدية اللي عطتها في آخر يوم من الثانوية...جلست تقرا الرسالة وهي تصيح... وخاصة يوم قرأت"سوف أدعو لك ما دام فيني عرق ينبض" زاد صياحها وهي تقول..هي تدعي لي طول هذه السنوات وأنا غافلة يا ليت إني ما تعرفت على وحدة اسمها شذى ياليت إني سمعت نصايح ريما وجلست معها...
جلست تتذكر كل المواقف اللي كانوا مع بعض..
تتذكر كيف كانت شذى تعاملها بقسوة...
سمعت الشريط "وغارت الحور"...
لـ"عبد المحسن الأحمد"اللي عطتها ريما
تأثرت مرررة لان كان أسلوبه محمس...
طول الوقت وهي تصيح ...
أخذت بينها وبين نفسها عهد أنها تترك المعاصي
وبدت تأمر بالمعروف وتنهي عن المنكر...
"مرت شهور"

اتصلت عليها وحدة...
.......: السلام عليكم ورحمة الله وبركاته
سارة: وعليكم السلام من معاي...
......: أنا أ/ نورة من دار التحفيظ القران
سارة: ياهلا فيك...
أ/نورة:ممكن اطلب منك طلب يا الغالية...
سارة: آمري ..
أ/نورة:أبغى منك تلقين عندنا محاضرة...
سارة وهي متفاجئة: بس أنا ولا مرة ألقيت محاضرة...
أ/نورة:بس ما شاء الله عليك أسلوبك مرة حلو والبنات يتأثرون منك كثير ...
سارة: خلاص ...ولا يهمك...

سارة راحت وألقت المحاضرة وصراحة أسلوبها مرة شيق..
من المحاضرة قالت قصة:
في مغسلة الأموات كانوا يغسلون فتاة خرج من انفها مادة بيضاء ملأت الغرفة بريحة المسك..
!!سبحان الله !! فعلا أنها ريحة المسك...
فسألوا عنها فقالوا: لم تترك فريضة منذ سن التمييز..ولم تكن تشاهد الأفلام والمسلسلات.. ولا تسمع الأغاني...وكانت تصوم الاثنين والخميس...وكانت تتمنى أن تغسل الأموات
فغُسِلَت قبل ان تُغسَل...فسبحان الله...

ًَُ
"خلصت المحاضرة"
البنات تجمعوا عند سارة...
بنت من البنات: صراحة أنا مرة تأثرت من محاضرتك وان شاء الله أبغير حياتي من معاصي إلى طاعات ...
بنت ثانية: صراحة ودي أصير داعية مثلك والكل يحبوني مثل ما يحبونك...
بنت ثالثة: أنا احبك في الله وابدعيلك في كل صلاة بأن الله يثبتك...
سارة مرة فرحت ....وقالت بينها وبين نفسها
*واخيــــــرا وجدت طعم السعادة*

اكتشفت إن السعادة في طاعة الله مب في المعاصي.... وتذكرت كلام ريما اللي كاتبته في الرسالة "أتمنى أن تكوني داعية يوم من الأيام تأمرين بالمعروف وتنهين عن المنكر"
ياللا أنا يا ريما صرت داعية مثل ما تتمنين... ياليت انك هنا سمعتي محاضرتي...يا ليت انك جنبي وتشجعيني..
بس أبصير ادعي لك إن ربي يرحمك رحمة واسعة...وتصيرين سعيدة في قبرك مثل ما أنا سعيدة في الدنيا...
<< تمـــــــــــــــــــــــــــــــــــــت >>
* أتمـــــــــــنى هــــــــذه القصــــــــــة *
* تعجبكم وتحوز على رضـــــــــــاكم*